ஷங்கர் இயக்கத்தில் கமல்ஹாசன் நடித்து வந்த படம் இந்தியன் 2. இந்த படம் கொரோனா வைரஸ் பரவல், செட் விபத்து, கமல்ஹாசனின் அரசியல் பணிகள் போன்ற காரணங்களால் பல மாதங்களாக முடங்கி இருந்தது.
இதனால் இந்தியன் 2 (Indian 2) படப்பிடிப்பு தாமதமாகி வந்ததால் இயக்குனர் ஷங்கர் (Director Shankar) அடுத்த பட பணிகளில் கவனம் செலுத்தத் தொடங்கினார். இந்த செயலால் அதிருப்தியடைந்த இந்தியன் 2 படத்தின் தயாரிப்பு நிறுவனமான லைகா, தங்கள் படத்தை முடித்துக்கொடுக்காமல் இயக்குனர் ஷங்கர் வேறு படத்தை இயக்க தடை விதிக்குமாறு நீதிமன்றத்தை நாடியது.
இதற்கு இருதரப்பும் பேசி பிரச்சனையை தீர்த்துக் கொள்ளுமாறு நீதிமன்றம் அறிவுறுத்தியது. இதையடுத்து இவர்கள் இடையே நடந்த பேச்சுவார்த்தையும் தோல்வியில் முடிந்தது.
இந்நிலையில், இந்தியன் 2 படத்தின் தயாரிப்பு நிறுவனமான லைகா லைகா நிறுவனம், இயக்குனர் ஷங்கர் இடையேயான பிரச்சினைக்கு தீர்வு காண, உச்சநீதிமன்ற ஓய்வுபெற்ற நீதிபதி ஆர்.பானுமதியை மத்தியஸ்தராக நியமித்து சென்னை உயர் நீதிமன்றம் உத்தரவிட்டுள்ளது. இதன்மூலம் விரைவில் இந்த பிரச்சினை முடிவுக்கு வரும் என எதிர்பார்க்கப்படுகிறது.
