பிரதமர் மோடி பல்வேறு வளர்ச்சித் திட்டங்களை தொடங்கி வைக்க இன்று உத்தரபிரதேசம் சென்றார். அங்கு பிரதமர் மோடிக்கு உத்தரபிரதேச முதல்மந்திரி யோகி ஆதித்யநாத் புத்தர் சிலை கொடுத்து வரவேற்பு அளித்தார்.
பின்பு சித்தார்த் நகரில் நடைபெற்ற நிகழ்ச்சியில் புதிதாக 9 மருத்துவ கல்லூரிகளை பிரதமர் மோடி திறந்து வைத்தார். சித்தார்த்நகர், எடாஹ், ஹர்டோய், பிரதாப்கர், பதேபூர், டியோரியா, காசிப்பூர், மிர்சாபூர், ஜாவ்ன்பூர் ஆகிய 9 இடங்களில் இந்த மருத்துவ கல்லூரிகள் அமைக்கப்பட்டுள்ளன.
இவ்விழாவில் பிரதமர் மோடி பேசியதாவது,
“மகாத்மா புத்தர் பல வருடங்களாக வாழ்ந்த நிலத்தில் இருந்து 9 மருத்துவ கல்லூரிகள் தொடங்கப்படுகின்றன. ஆரோக்கியமான இந்தியாவின் கனவுகளை நிறைவேற்றுவதற்கான ஒரு பெரும் வெற்றிப்படி ஆகும். இங்குள்ள அனைவருக்கும் எனது வாழ்த்துக்களை தெரிவித்துக் கொள்கிறேன்.
புதிதாக தொடங்கப்பட்டுள்ள 9 மருத்துவ கல்லூரிகளின் மூலம் கூடுதலாக 2500 படுக்கைகள் சிகிச்சைக்காக சேர்க்கப்பட்டுள்ளன. இதன்மூலம், புதிதாக 5000க்கும் அதிகமான மருத்துவர்கள் மற்றும் துணை-மருத்துவ பணியாளர்கள் இப்போது உருவாக்கப்பட்டுள்ளனர். இனிமேல் பூர்வாஞ்சல் பகுதி வட இந்தியாவின் மருத்துவ மையமாக திகழும். கிழக்கு உத்தரபிரதேச இளைஞர்களின் மருத்துவ படிப்பிற்கான கனவு இப்போது நனவாகியுள்ளது’’ என்று கூறினார்.
