ஜப்பான் தலைநகர் டோக்கியோவில் இருந்து நேற்று காலை வழக்கம் போல் மின்சார ரெயில் ஒன்று புறப்பட்டு சென்றது. ரெயிலில் ஏராளமான பயணிகள் இருந்தனர். இந்த ரெயில் கோகுரியோ ரெயில் நிலையத்துக்கு அருகே சென்று கொண்டிருந்தபோது, ரெயிலில் இருந்த 20 வயது மதிக்கத்தக்க வாலிபர் ஒருவர் சக பயணிகளை திடீரென கத்தியால் குத்த தொடங்கினார்.
இதனால் ரெயிலில் பெரும் பதற்றம் உருவானது. ரெயில் உடனடியாக நிறுத்தப்பட்டது. இருந்தபோதிலும் அந்த வாலிபர் தன் கண்ணில் பட்டவர்களையெல்லாம் தொடர்ந்து கத்தியால் சரமாரியாக குத்தினார். இதில் 17 பேர் பலத்த காயமடைந்தனர்.
இதை தொடர்ந்து அந்த வாலிபர் பயணிகளை நோக்கி துப்பாக்கியால் சுட தொடங்கினார். ஆனால் அதற்குள் இந்த சம்பவம் குறித்து தகவல் அறிந்து விரைந்து வந்த போலீசார் அந்த வாலிபரை மடக்கி பிடித்து கைது செய்தனர். முன்னதாக கடந்த ஆகஸ்டு மாதம் முதல் வாரத்தில் இதே போல் டோக்கியோவில் ஓடும் ரெயிலில் நடந்த கத்திக்குத்து தாக்குதலில் 10 பேர் படுகாயமடைந்தது நினைவுகூரத்தக்கது.
