அதிகமான உறுப்பினர்களை பதிவு செய்யும், காங்கிரஸ் தொண்டர்களுக்கு, குளிர்ச்சாதன பெட்டி, எல்.இ.டி., ‘டிவி’ வழங்குவதாக, அக்கட்சி ஆசை காண்பித்துள்ளது. அதற்கு, பா.ஜ., கிண்டல் செய்துள்ளது.
கர்நாடக சட்டசபை தேர்தலுக்கு, காங்கிரஸ் தயாராகி வருகிறது. கட்சியில் உறுப்பினர் சேர்க்கையை துவங்கியுள்ளது. முன்னாள் முதல்வர் சித்தராமையா தொகுதியான, பாகல்கோட்டின் பாதாமியில், பாதாமி மற்றும் குளேதகுட்டா தாலுகாக்கள் வருகிறது.
இங்குள்ள தொண்டர்கள், கட்சியில் அதிகமான தொண்டர்களை சேர்த்தால், பரிசுப் பொருட்கள் வழங்குவதாக, காங்கிரஸ் தலைவர்கள் சோனியா, சுர்ஜிவாலா, சித்தராமையா, சிவகுமார் உருவப்படங்களை கொண்ட விளம்பரம், பல இடங்களில் தென்படுகிறது.
குறிப்பாக, 5,000க்கும் மேற்பட்ட உறுப்பினர்களை சேர்க்கும் தொண்டர்களுக்கு, முதல் பரிசாக குளிர்சாதன பெட்டி, 3,000க்கும் அதிகமான உறுப்பினர்களை சேர்ப்பவருக்கு, இரண்டாம் பரிசாக எல்.இ.டி., தொலைக்காட்சி பெட்டி.மேலும், 2,000க்கும் அதிகமானவர்களை சேர்ப்போருக்கு, மூன்றாம் பரிசாக மொபைல் போன் பரிசளிப்பதாக, விளம்பரத்தில் கூறப்பட்டு உள்ளது. இது கட்சிக்குள் பெரும் சலசலப்பை ஏற்படுத்தியுள்ளது.
இது குறித்து பா.ஜ., கூறியுள்ளதாவது:ஒரு தேசிய கட்சி, இத்தகைய அவலநிலைக்கு வந்துள்ளது. கட்சியில் உறுப்பினர்களை சேர்க்கவும், ஆசை வார்த்தை காண்பிக்கிறது. சித்தராமையா எம்.எல்.ஏ.,வாக உள்ள பாதாமியில், அதிகமான உறுப்பினர்களை பதிவு செய்தால் பரிசு அறிவித்துள்ளனர்.காங்கிரஸ் மூழ்கும் படகு என்பதற்கு, இதை விட வேறு உதாரணம் தேவையில்லை.இவ்வாறு பா.ஜ., கூறியுள்ளது.
