மாமல்லபுரத்தில் வருகிற ஜூலை 28-ந்திகதி முதல் ஆகஸ்டு 10-ந்திகதி வரை சர்வதேச செஸ் ஒலிம்பியாட் போட்டிகள் நடைபெற உள்ளன. இப்போட்டிகளில் உலகம் முழுவதிலும் இருந்து 187 நாடுகளை சேர்ந்த 2000 செஸ் விளையாட்டு வீரர்கள் பங்கேற்கின்றனர்.
இங்கு 22 ஆயிரம் சதுரஅடியில் ஒரு அரங்கமும், 52 ஆயிரம் சதுர அடியில் 2-வது அரங்கம் என இரண்டு அரங்கத்தில் செஸ் போட்டிகள் நடத்தப்பட உள்ளன. அரங்கம் 1-ல் 196 டேபில் போடப்பட்டு அதில் 49 அணிகள் பங்கேற்க உள்ளன.
அரங்கம் 2-ல் 512 டேபில் போடப்பட்டு 49 அணிகள் அதில் பங்கேற்க உள்ளன. இதற்காக தற்போது ஜெர்மன் தொழில் நுட்பத்தில் தயாரிக்கப்பட்ட 700 எலக்ட்ரானிக் செஸ் போர்டுகள் சர்வதேச ஒலிம்பியாட் போட்டி குழுவினர் ஜெர்மன் நாட்டில் இருந்து வரவழைத்துள்ளனர்.
இதில் முதல் கட்டமாக தயாராகி வரும் 512 டேபில் போடப்பட்டுள்ள 2-வது அரங்கத்தில் டிஜிட்டல் செஸ் போர்டுகள் டேபில் வாரியாக கணினியுடன் இணைக்கும் கேபிளுடன் இணைக்கப்பட்டன.
அதேபோல் அனைத்து செஸ் போர்டுகளையும் கணினி மூலம் இணைக்கும் வசதிகளும் மென்பொருள் பணியாளர்கள் மூலம் செய்யப்பட்டு வருகின்றன.
அதேபோல் ஒவ்வொரு டேபிலிலும் வரிசை எண்களுடன் அமைக்கப்பட்ட செஸ் போர்டு விவரங்கள், ஒவ்வொரு டேபிலிலும் எந்த நாட்டு வீரர்கள் அமருகின்றனர், அவர்களுக்கான எலக்ட்ரானிக் செஸ் போர்டுகள் எவை என்பது குறித்து சரிபார்க்கப்பட்டு, அவைகள் அந்தந்த டேபிலில் கேபிள் மூலம் இணைக்கப்பட்டு வருகின்றன.
