ஐக்கிய அரபு அமீரகத்தின் துபாயில் இருந்து டெல்லிக்கு விமானத்தில் விலை உயர்ந்த பொருட்கள் கடத்தி வரப்படுவதாக டெல்லி விமான நிலைய சுங்கத்துறையினருக்கு ரகசிய தகவல் கிடைத்தது. இதனை தொடர்ந்து, துபாயில் இருந்து இன்று டெல்லி வந்த விமான பயணிகளிடம் அதிகாரிகள் சோதனை நடத்தினர்.
அப்போது, ஒரு பயணியிடமிருந்து விலை உயர்ந்த வாட்ச்களை அதிகாரிகள் பறிமுதல் செய்தனர். அந்த பயணியின் பையை சோதனை செய்த போது அதில், ரோலக்ஸ், ஜேக்கப் அண்ட் கோ, பைகெட் லிம்லைட் ஸ்டெல்லா உள்ளிட்ட விலை உயர்ந்த 7 வாட்ச்கள் கைப்பற்றப்பட்டன. அதில், ஜேக்கப் அண்ட் கோ என்ற வாட்ச் தங்கம் மற்றும் வைரக்கல் பதிக்கப்பட்டது என தெரியவந்துள்ளது.
அந்த ஒற்றை வாட்சின் மதிப்பு 27 கோடியே 9 லட்ச ரூபாய் என அதிகாரிகள் தெரிவித்துள்ளனர். மேலும், வாட்ச்களுடன் சேர்த்து தங்கம், வைரம் பதிக்கப்பட்ட கைசெயின் மற்றும் ஐபோன் உள்ளிட்டவற்றையும் அதிகாரிகள் பரிமுதல் செய்தனர்.
