இந்திய ஆக்கி அணி, ஆஸ்திரேலியாவில் சுற்றுப்பயணம் செய்து அந்த நாட்டு அணிக்கு எதிராக 5 ஆட்டங்கள் கொண்ட தொடரில் விளையாடி வருகிறது. இதில் முதல் 2 ஆட்டங்களில் ஆஸ்திரேலியா வெற்றி பெற்றது. இந்த நிலையில் 3-வது ஆட்டம் அடிலெய்டில் நேற்று நடந்தது.
திரில்லிங்கான இந்த ஆட்டத்தில் கடைசி நிமிடத்தில் (60-வது நிமிடம்) ஆகாஷ்தீப் சிங் அடித்த கோலால் இந்திய அணி 4-3 என்ற கோல் கணக்கில் ‘நம்பர் ஒன்’ அணியான ஆஸ்திரேலியாவுக்கு அதிர்ச்சி அளித்து முதல் வெற்றியை பதிவு செய்தது.
முன்னதாக இந்திய தரப்பில் கேப்டன் ஹர்மன்பிரீத் சிங் 12-வது நிமிடத்திலும், அபிஷேக் 47-வது நிமிடத்திலும், ஷாம்ஷெர் சிங் 57-வது நிமிடத்திலும் கோல் அடித்தனர்.
ஆஸ்திரேலியா தரப்பில் ஜாக் வெல்ச் 25-வது நிமிடத்திலும், கேப்டன் அரென் ஜேல்ஸ்கி 32-வது நிமிடத்திலும், நாதன் எபிராம்ஸ் 59-வது நிமிடத்திலும் கோல் போட்டனர்.
ஆஸ்திரேலியாவுக்கு எதிராக தொடர்ந்து 12 ஆட்டங்களில் தோல்வி கண்டு இருந்த இந்திய அணி அந்த மோசமான பயணத்துக்கு முற்றுப்புள்ளி வைத்தது. இவ்விரு அணிகள் இடையிலான 4-வது ஆட்டம் வருகிற 3-ந் தேதி நடக்கிறது.
