மத்திய பிரதேசத்தின் இந்தூர் அருகே உள்ள படேல் நகரில் பழமை வாய்ந்த பாலேஷ்வர் மகாதேவ் கோவில் உள்ளது. ராம நவமியையொட்டி இங்கு நேற்று சிறப்பு வழிபாடுகள் நடந்தன. இதற்காக ஏராளமான பக்தர்கள் கோவிலில் குழுமியிருந்தனர்.
இதில் சிலர் அங்குள்ள கிணறு ஒன்றின் மேற்கூரையில் (சிலாப்) நின்றிருந்தனர். இதனால் பாரம் தாங்காமல் அந்த கூரை இடிந்து விழுந்தது. இதில் சுமார் 35க்கும் மேற்பட்டோர் பேர் கிணற்றுக்குள் விழுந்தனர்.
இது குறித்து தகவல் அறிந்ததும் போலீசார் மற்றும் தீயணைப்பு வீரர்கள் சம்பவ இடத்துக்கு விரைந்து சென்று மீட்பு பணிகளை தொடங்கினர். மேலும் சக பக்தர்களும் இந்த மீட்பு பணிகளுக்கு உதவினர்.
இந்த பயங்கர சம்பவத்தில் 12 பக்தர்கள் பரிதாபமாக உயிரிழந்தனர். அவர்களது உடல்களை மீட்புக்குழுவினர் மீட்டனர். அத்துடன் இந்த சம்பவத்தில் மேலும் சிலர் காயமடைந்தனர். அவர்களும் மீட்கப்பட்டு சிகிச்சைக்காக ஆஸ்பத்திரிக்கு அனுப்பி வைக்கப்பட்டனர்.
இந்தநிலையில், இந்த விபத்தில் பலியானவர்களின் எண்ணிக்கை 35ஆக அதிகரித்துள்ளது. கிணற்றில் விழுந்த ஒருவரை தேடும் பணி தொடர்ந்து நடந்து வருகிறது.
பல மணி நேர போராட்டத்துக்குப் பின் கிணற்றில் இருந்து படுகாயங்களுடன் மீட்கப்பட்ட 18 பேருக்கு மருத்துவமனையில் சிகிச்சை அளிக்கப்பட்டு வருகிறது. 2 பேர் டிஸ்சார்ஜ் செய்யப்பட்டனர்.
