நிதி இராஜாங்க அமைச்சர் ரஞ்சித் சியம்பலாபிட்டிய சந்தையில் சீனியின் விலை அதிகரிப்பு தொடர்பில் அறிக்கையொன்றை வழங்குமாறு வர்த்தக முதலீட்டு கொள்கை திணைக்களத்திற்கு உத்தரவிடப்பட்டுள்ளதாக நாடாளுமன்றத்தில் தெரிவித்தார்.
டொலரின் பெறுமதியும் வீழ்ச்சியடைந்துள்ள நிலையில் சீனியின் விலை உயரும் சாத்தியக்கூறுகள் இல்லை என அமைச்சர் இதன் போது குறிப்பிட்டுள்ளார்.
இதனிடையே, கோதுமை மாவிற்கு விதிக்கப்பட்டுள்ள வரி காரணமாக மாவின் விலையை அதிகரிக்க முடியாது எனவும் அமைச்சர் சுட்டிக்காட்டியுள்ளார்.
ரூபாவுடன் ஒப்பிடுகையில் டொலரின் பெறுமதி 13 வீதம் குறைந்துள்ளதாகவும் உலக சந்தையில் கோதுமை மாவின் விலையும் 15 வீதம் குறைந்துள்ளதாகவும் இராஜாங்க அமைச்சர் தெரிவித்தார்.
இவ்வாறான சூழ்நிலையில் அரசாங்கத்தினால் விதிக்கப்பட்டுள்ள வரி காரணமாக கோதுமை மாவின் விலையில் அதிகரிப்பு ஏற்படாது என அமைச்சர் ரஞ்சித் சியம்பலாபிட்டிய குறிப்பிட்டுள்ளார்.
