செய்யாறு அருகே தனியார் தொழிற்சாலை பஸ் சாலையோர பள்ளத்தில் கவிழ்ந்து விபத்துக்குள்ளானதில், அதில் பயணம் செய்த 23 தொழிலாளர்கள் காயம் அடைந்தனர்.
காஞ்சீபுரம் மாவட்டம் ஒரகடம் பகுதியில் உள்ள தனியார் தொழிற்சாலைகளில் திருவண்ணாமலை, ராணிப்பேட்டை மாவட்டங்களை சேர்ந்த தொழிலாளர்கள் பணியாற்றி வருகின்றனர்.
நேற்று அதிகாலை ஒரு தொழிற்சாலைக்கு சொந்தமான பஸ், செய்யாறு மற்றும் ஆற்காடு தாலுகா பகுதிகளிலிருந்து தொழிலாளர்களை ஏற்றிக்கொண்டு காஞ்சிபுரம்-ஆற்காடு சாலையில் சென்று கொண்டிருந்தது.
அப்போது கொடையம்பாக்கம் கிராமம் அருகே சாலையின் வளைவில் திரும்பிய போது கட்டுப்பாட்டை இழந்த பஸ் சாலையோர வயல்வெளி பள்ளத்தில் கவிழ்ந்து விபத்துக்குள்ளானது.
விபத்தில் லேசான காயமடைந்த 18 பேர் முதலுதவி சிகிச்சை பெற்றபின் வீடு திரும்பினர். பலத்த காயமடைந்த ஆயிரம்மங்கலம், பெருங்கட்டூர், கொடையம்பாக்கம் உள்ளிட்ட பகுதியை சேர்ந்த 5 பேர் உள் நோயாளிகளாக அனுமதிக்கப்பட்டு தொடர்ந்து சிகிச்சை பெற்று வருகின்றனர். இவ்விபத்து குறித்து மோரணம் போலீசார் விசாரணை மேற்கொண்டு வருகின்றனர்.
