திரையுலகினருக்கு நடப்பு வருடம் சிறப்பான ஆண்டாகவே தொடர்கிறது. வாரிசு, துணிவு, பொன்னியின் செல்வன், ஜெயிலர் உள்ளிட்ட பெரிய படங்கள் நல்ல வசூலையும், சிறிய படங்கள் திருப்தியான வருமானத்தையும் கொடுத்துள்ளன.
வரப்போகும் நான்கு மாதங்களும் தொடர்ந்து பெரிய நடிகர்களின் படங்கள் திரைக்கு வர இருக்கின்றன. இந்தப் படங்களும் வசூல் குவிக்கும் என்ற நம்பிக்கையில் பட உலகினர் இருக்கிறார்கள்.
அடுத்தடுத்து திரைக்கு வரும் பெரிய நடிகர்களின் படங்கள் விவரம்:- அகமது இயக்கத்தில் ஜெயம்ரவி, நயன்தாரா நடித்துள்ள `இறைவன்’ படம் வருகிற 25-ந் தேதி ரிலீசாக உள்ளது.
அதே நாளில், துல்கர் சல்மானின் மிகுந்த எதிர்பார்ப்புக்கு உரிய படமான `கிங் ஆப் கோதா’ படமும் வெளியாக உள்ளது. ஷாருக்கான், நயன்தாரா ஜோடியாக நடித்துள்ள `ஜவான்’ படம் தமிழ், இந்தி உள்ளிட்ட பல மொழிகளில் செப்டம்பர் 7-ந் தேதி ரிலீசாக உள்ளது.
விநாயகர் சதுர்த்தியை முன்னிட்டு செப்டம்பர் 15-ந் தேதி விஷால், எஸ்.ஜே.சூர்யா நடித்துள்ள `மார்க் ஆண்டனி’ படம் வருகிறது. டைம் டிராவலை மையமாக கொண்டு இந்தப் படம் உருவாகி உள்ளது. அதே நாளில் `சந்திரமுகி’ படத்தின் இரண்டாம் பாகமாக ராகவா லாரன்ஸ் நடிப்பில் உருவாகியுள்ள `சந்திரமுகி 2′ படமும் திரைக்கு வருகிறது.
