பாகிஸ்தானில் தலிபான் ஆதரவு பெற்ற இஸ்லாமிய தீவிரவாதிகள் நடத்திய கார் வெடிகுண்டு தாக்குதலில் 23 இராணுவ வீரர்கள் கொல்லப்பட்டுள்ளதாக பாகிஸ்தான் இராணுவத்தின் ஊடகப் பிரிவு தெரிவித்துள்ளது.
கைபர்-பக்துன்கவா மாகாணத்தின் தெற்கு வஸிரிஸ்தான் மாவட்டத்தில் தேரா இஸ்மாயில் கான் தாராபன் என்ற இடத்தில் உள்ள இராணுவ நிலைகள் மீது 6 தீவிரவாதிகள் நேற்று அதிகாலையில் தாக்குதல் நடத்தியுள்ளனர்.
இந்த தாக்குதலை இராணுவத்தினர் முறியடித்துள்ளனர். இதனையடுத்து தீவிரவாதிகள் வெடிகுண்டுகள் நிரப்பப்பட்ட ஒரு வாகனத்தை ஓட்டி வந்து இராணுவ முகாம் கட்டிடத்தில் மீது மோதி தற்கொலை தாக்குதலை நடத்தியுள்ளனர்.
சம்பவத்தில் 6 தீவிரவாதிகளுடன் 23 இராணுவத்தினர் கொல்லப்பட்டுள்ளனர்.
கைபர்-பக்துன்கவா மாகாணத்தில் செவ்வாய்க்கிழமை நடத்தப்பட்ட இந்த தாக்குதல் அண்மைக் காலங்களில் நடத்தப்பட்ட மிக மோசமான தாக்குதலாக கருதப்படுகிறது.
பாகிஸ்தானில் தலிபான் ஆதரவு தீவிரவாதிகள் நடத்தி வரும் வன்முறை தாக்குதல்கள் அண்மைய காலமாக அதிகரித்து வருகிறது.
