மாணிக்கக்கல் வியாபாரி ஒருவரைத் தேடி குற்றப் புலனாய்வுத் திணைக்களத்தின் விசேட குழுவொன்று மாலைதீவுக்குச் சென்று நேற்று அதிகாலை அவரை இலங்கைக்கு அழைத்து வந்துள்ளது.
76 கோடி ரூபா பணத்தை மோசடி செய்து நாட்டை விட்டு தப்பிச் சென்றவரே இவ்வாறு அழைத்து வரப்பட்டுள்ளார்.
மாலைத்தீவுக்கு தப்பிச் சென்று நான்கு மாதங்கள் தலைமறைவாகியிருந்த மாணிக்கக்கல் வியாபாரி மொஹமட் இஸ்திகார், சர்வதேச பொலிஸாரின் உதவியுடன் இலங்கைக்கு அழைத்து வரப்பட்டுள்ளார்.
பேருவளை மாணிக்கக்கல் வியாபாரிகளின் மாணிக்கக் கற்களை விற்பனை செய்வதாகக் கூறி இந்த வர்த்தகர் மாணிக்கக் கற்களை எடுத்துச் சென்று ஏமாற்றியதாக குற்றப் புலனாய்வுத் திணைக்களத்தின் நிதி மற்றும் வர்த்தக குற்றப் புலனாய்வுப் பிரிவில் வர்த்தகர்கள் இருவர் முறைப்பாடு செய்திருந்தனர்.
அதற்கமைய, சந்தேகநபரை கண்டுபிடிக்க ஆரம்பித்த விசாரணையில் 4 மாதங்களாக மாலைதீவில் அவர் பதுங்கியிருந்தமை தெரியவந்துள்ளது.
சந்தேக நபரை உடனடியாக இலங்கைக்கு அழைத்து வருவதற்கான நடவடிக்கையை மாலைதீவு அரசாங்கத்தின் ஆதரவுடன் ஆரம்பிக்குமாறு குற்றப் புலனாய்வு திணைக்களத்திற்கு பொறுப்பான பிரதி பொலிஸ் மா அதிபர் ரொஹான் பிரேமரத்ன உத்தரவிட்டுள்ளார்.
