உக்ரைன் ரஷ்யா போரில் அமெரிக்கா உள்பட உலகின் பல நாடுகள் ரஷ்யாவுக்கு எதிராக நிற்கின்றன. போரை கடுமையாக எதிர்க்கும் அந்த நாடுகள் ரஷ்யா மீது ஏராளமான பொருளாதார தடைகளை விதித்துள்ளன.
அதே சமயம் சீனா, போர் தொடங்கிய நாள் முதல் ரஷ்யாவுக்கு எதிராக எந்த கருத்தும் தெரிவிக்காமல் இருந்து வருகிறது. மாறாக ரஷ்யா மீதான பொருளாதார தடைகளை கடுமையாக எதிர்த்து வருகிறது.
இந்த நிலையில் உக்ரைன் மீதான போரில் ரஷ்யாவுக்கு சீனா, உதவக்கூடாது என உக்ரைன் நாட்டின் ஜனாதிபதி வோலோடிமிர் ஜெலன்ஸ்கி வலியுறுத்தி உள்ளார்.
ஆஸ்திரேலியாவை சேர்ந்த 21 பல்கலைக்கழகங்களின் மாணவர்கள் மத்தியில் காணொளி காட்சி வாயிலாக உரையாற்றியபோது ஜெலன்ஸ்கி இதை தெரிவித்தார்.
“இப்போதைக்கு, சீனா உண்மையில் நடுநிலையாக உள்ளது, நான் நேர்மையாகச் சொல்வேன், சீனா ரஷ்யாவுடன் இணைவதை விட இந்த நடுநிலை சிறந்தது, ரஷ்யாவுக்கு சீனா உதவாது என்பது எங்களுக்கு மிகவும் முக்கியம்” என கூறினார்.
