நுவரெலியா – தலவாக்கலை பொலிஸ் பிரிவுக்குட்பட்ட லோகி தோட்டத்தின் மிடில்டன் பிரிவில் திடீர் தீ விபத்தால் லயன் குடியிருப்பில் 7 வீடுகள் முழுமையாக தீக்கிரையாகியுள்ள நிலையில் 5 வீடுகள் பகுதியளவில் சேதமாகியுள்ளன. இந்த அனர்த்தம் நேற்றைய தினம் (15.01.2023) பதிவாகியுள்ளது.
குறித்த அனர்த்தத்தால் 12 குடும்பங்களை சேர்ந்த 49 இற்கும் மேற்பட்டோர் நிர்க்கதியாகியுள்ளதாக தெரிவிக்கப்பட்டுள்ளது.
பரவிய தீயை அதே தோட்டத்தைச் சேர்ந்த தோட்டத் தொழிலாளர்கள் மற்றும் பிரதேசவாசிகள், தலவாக்கலை பொலிஸாருடன் இணைந்து சுமார் மூன்று மணித்தியாலயங்களுக்கு பிறகு தீயை கட்டுப்பாட்டுக்குள் கொண்டு வந்துள்ளனர்.
இந்த தீ விபத்தில் எவருக்கும் காயமேற்படாத நிலையில் பெருமளவு பொருட்கள் தீயில் கருகியுள்ளதாக தெரியவருகிறது.
தீயினால் பாதிக்கப்பட்ட 12 குடும்பங்களில் 3 குடும்பங்கள் தலவாக்கலை தமிழ் மகா வித்தியாலயத்தில் தங்க வைக்கப்பட்டுள்ளனர்.
மேலும், 9 குடும்பங்கள் உறவினர்களின் வீடுகளில் தற்காலிகமாக குடியமர்த்தப்பட்டுள்ளதாக தலவாக்கலை பொலிஸார் தெரிவித்துள்ளனர்.
இந்த தீ விபத்து தொடர்பில் மேலதிக விசாரணைகளை பொலிஸார் முன்னெடுத்துள்ளமை குறிப்பிடத்தக்கது.
