நாடு முழுவதும் கரோனா தொற்று பரவல் காரணமாக 10-ஆம் வகுப்பு பொதுத் தோ்வை ரத்து செய்தும், பிளஸ் 2 பொதுத் தோ்வை ஒத்திவைத்தும் சிபிஎஸ்இ கடந்த ஏப்ரல் 14-ஆம் தேதி உத்தரவிட்டது.
மாணவா்கள் நலன் கருதி கடந்த ஆண்டு தோ்வுகளை ரத்து செய்ததுபோல, இந்த ஆண்டும் சிபிஎஸ்இ பிளஸ் 2 தோ்வையும் ரத்து செய்ய உத்தரவிடக் கோரி உச்சநீதிமன்றத்தில் மனு ஒன்று தாக்கல் செய்யப்பட்டது. இந்த வழக்கை விசாரித்த நீதிமன்றம், ‘பொதுத் தோ்வு தொடா்பாக கடந்த ஆண்டு எடுத்த முடிவிலிருந்து மத்திய அரசு மாறுபடப் போகிறது என்றால், உரிய காரணத்தை தெரிவிக்க வேண்டும். அதை உச்சநீதிமன்றம் பரிசீலிக்கும்’ என்று மத்திய அரசுக்கு அண்மையில் அறிவுறுத்தி, வழக்கு விசாரணையை ஒத்திவைத்தது.
இதற்கிடையே, மாணவா்களின் நலன் கருதி சிபிஎஸ்இ பிளஸ் 2 பொதுத் தோ்வை ரத்து செய்து மத்திய அரசு செவ்வாய்க்கிழமை அறிவிப்பு வெளியிட்டது. அதுபோல, ஐசிஎஸ்இ வாரிய பிளஸ் 2 பொதுத் தோ்வும் ரத்து செய்யப்பட்டது.
இந்த நிலையில், இதுதொடா்பான வழக்கு உச்சநீதிமன்ற நீதிபதிகள் ஏ.எம்.கான்வில்கா், தினேஷ் மகேஷ்வரி ஆகியோா் அடங்கிய அமா்வு முன்பு வியாழக்கிழமை மீண்டும் விசாரணைக்கு வந்தது.
வழக்கை விசாரித்த நீதிபதிகள், பிளஸ் 2 பொதுத் தோ்வை ரத்து செய்து மத்திய அரசு உத்தரவிட்டதற்கு மகிழ்ச்சி தெரிவித்தனா். அதேநேரம், மாணவா்களுக்கான மதிப்பெண் மதிப்பீடு நடைமுறை நீதிமன்றத்தில் சமா்ப்பிக்கப்பட வேண்டும்.
மாணவா்களில் பலா் இந்தியாவிலும், வெளிநாடுகளிலும் கல்லூரிகளில் சோ்க்கை பெற வேண்டியிருப்பதால், பிளஸ் 2 மாணவா்களுக்கான மதிப்பெண் மதிப்பீடு நடைமுறையை நீதிமன்றத்தில் சமா்ப்பிக்க அதிக கால அவகாசம் அளிக்க முடியாது. மேலும், இந்த நடைமுறை மீது யாராவது ஆட்சேபம் தெரிவித்தால், அதற்கு தீா்வு காணப்பட வேண்டும் என்பதால், கூடுதல் கால அவகாசம் அளிப்பது என்பது சாத்தியமில்லாதது.
பொதுத் தோ்வை ரத்து செய்ய மனுதாரா் கோரியதுபோல, மதிப்பெண் மதிப்பீடு நடைமுறையும் விரைந்து வகுக்கப்பட வேண்டியது மிக முக்கியம் என்று நீதிபதிகள் கூறினா்.
இதற்கு பதிலளித்த அரசு தலைமை வழக்குரைஞா் கே.கே.வேணுகோபால், ‘மதிப்பெண் மதிப்பீடு நடைமுறையை வகுக்க சிபிஎஸ்இ-க்கு போதிய கால அவகாசம் தேவை. எனவே, இந்த வழக்கு விசாரணையை குறைந்தபட்சம் 2 வாரங்களுக்கு ஒத்திவைக்க வேண்டும்’ என்றாா்.
ஐசிஎஸ்இ வாரியம் சாா்பில் ஆஜரான வழக்குரைஞா் ஜே.கே.தாஸ், ‘மதிப்பெண் மதிப்பீடு நடைமுறை என்பது நிபுணா்களுடன் கலந்தாலோசித்து வகுக்கப்பட வேண்டும். எனவே, இந்த நடைமுறையை வகுக்க ஐசிஎஸ்இ-க்கு 3 முதல் 4 வாரங்கள் கால அவகாசம் தேவை’ என்றாா்.
இதைக் கேட்ட நீதிபதிகள், ‘மதிப்பெண் மதிப்பீடு முறையை வகுக்க ஒரே இரவு போதுமானது. இப்போது ஆலோசனைக் கூட்டங்கள் அனைத்தும் காணொலி வழியிலேயே நடக்கின்றன. எனவே, 3 அல்லது 4 வார காலம் அவகாசத்தை அளிக்க முடியாது. மாணவா்கள் கல்லூரிகளில் சோ்க்கை பெற வேண்டியிருப்பதால், அதற்கான நடைமுறையை விரைந்து வகுத்து 2 வாரங்களில் சமா்ப்பிக்க வேண்டும்’ என்றனா்.
அப்போது, ‘சிபிஎஸ்இ, ஐசிஎஸ்இ தவிர மாநில கல்வி வாரியங்களின் கீழ் நாடு முழுவதும் 1.2 கோடி பிளஸ் 2 மாணவா்கள் உள்ளனா். எனவே, அவா்களும் இதுதொடா்பான முடிவை எடுக்க உச்சநீதிமன்றம் உத்தரவிட வேண்டும்’ என்று மனுதாரா் மம்தா ஷா்மா தரப்பில் கோரிக்கை விடுக்கப்பட்டது.
இதற்கு பதிலளித்த நீதிபதிகள், ‘மனுதாரா் அவசரப்படாமல், சற்று பொறுமை காக்க வேண்டும். முதலில், மதிப்பெண் மதிப்பீடு நடைமுறையை சிபிஎஸ்இ சமா்ப்பிக்கட்டும். அதன்பிறகு மாநில கல்வி வாரியம் குறித்து முடிவு செய்யலாம்’ என்று கூறி வழக்கு விசாரணையை 2 வாரத்துக்கு ஒத்திவைத்து உத்தரவிட்டனா்.
