ஜூன் மாதம் ஜெனீவாவில் நடந்த பிடன்-புட்டின் உச்சிமாநாட்டின் பிறகு, சுவிஸ் நகரில் உயர் மட்ட அதிகாரிகளுக்கு இடையிலான பேச்சுவார்த்தைகள் தொடர்ந்து நடந்து வருகின்றன.
ஜெனீவாவில் உள்ள அமெரிக்க இராஜதந்திர பணியகத்தில் நேற்று புதன்கிழமை சந்திப்பொன்று தொடங்கியது, இந்த சந்திப்பில் அமெரிக்க வெளியுறவுத்துறை செயலாளர் Wendy Sherman மற்றும் ரஷ்ய துணை வெளியுறவு அமைச்சர் Sergei Ryabkov ஆகியோர் தலைமை தாங்குகின்றனர்.
இவர்கள்,எதிர்கால ஆயுதக் கட்டுப்பாடு மற்றும் இடர் குறைப்பு நடவடிக்கைகளுக்கான அடித்தளத்தை அமைக்கும் ஒரு திட்டமிட்ட மற்றும் வலுவான உரையாடலைத் தொடங்க தங்கள் ஜனாதிபதியிடமிருந்து ஆணை பெற்றவர்கள் என கடந்த வாரம் பேச்சுவார்த்தை பற்றி அறிவித்த அமெரிக்க வெளியுறவுத்துறை கூறியது.
மூலோபாய ஸ்திரத்தன்மை குறித்த இலக்கு மற்றும் ஆற்றல்மிக்க உரையாடலை நிறுவுவதற்கான விருப்பத்தில் அமெரிக்கா எவ்வளவு தீவிரமாயுள்ளது என்பதை இந்த சந்திப்பு காண்பிக்கும் என்று நம்புவதாக செவ்வாயன்று ரஷ்ய அமைச்சர் கூறினார்.
அமெரிக்காவுடன் புதிய START அணு ஆயுதக் கட்டுப்பாட்டு ஒப்பந்தத்தின் ஐந்தாண்டு நீட்டிப்புக்கு ஜனவரி மாதம் ரஷ்யா ஒப்புதல் அளித்தது, இந்த ஒப்பந்தம் ரஷ்யாவும் அமெரிக்காவும் பயன்படுத்தக்கூடிய மூலோபாய அணு ஆயுதங்கள், ஏவுகணைகள் மற்றும் குண்டுவீச்சுக்களின் எண்ணிக்கையை கட்டுப்படுத்துகிறது.
