சன் பிக்சர்ஸ் தயாரிப்பில் சிவா இயக்கும் அண்ணாத்த படத்தில் நடித்து முடித்துள்ளார் ரஜினிகாந்த். இந்த படத்தில் ரஜினிகாந்திற்கு ஜோடியாக நடிக்கிறார் நயன்தாரா. இவர்களுடன் குஷ்பு, மீனா, கீர்த்தி சுரேஷ், சூரி, சதீஷ், ஜகபதி பாபு உள்ளிட்டோர் நடித்து வருகின்றனர். வெற்றி ஒளிப்பதிவு செய்யும் இந்தப் படத்துக்கு டி.இமான் இசையமைக்கிறார். இந்நிலையில் ‘அண்ணாத்த’ படப்பிடிப்பு தளத்தில் கொரோனா கட்டுப்பாடுகளை மீறி மக்கள் கூடியதால் பரபரப்பு ஏற்பட்டுள்ளது.
அண்ணாத்த தபடத்தை இந்த ஆண்டு பொங்கலுக்கு வெளியிட திட்டமிட்டிருந்தனர் படக்குழுவினர். ஆனால் கொரோனா அச்சம் காரணமாக திட்டமிட்டபடி படப்பிடிப்பு நடத்த இயலவில்லை. இந்நிலையில் தற்போது ஏற்பட்டுள்ள கொரோனா இரண்டாவது அலையின் தீவிரத்துக்கு முன்னதாகவே அண்ணாத்த திரைப்படத்தின் பெரும்பாலான காட்சிகளை எடுத்து முடித்துவிட்டது படக்குழு.
இந்நிலையில் அண்மையில் மருத்துவ பரிசோதனைக்காக அமெரிக்கா சென்று ரஜினிகாந்த் இந்தியா திரும்பிய பின்னர் அண்ணாத்த படத்தின் படப்பிடிப்பை துவங்கினார்கள் படக்குவினர். அதனை தொடர்ந்து இந்த படத்தின் இறுதிகட்ட படப்பிடிப்பு மேற்கு வங்கத்தில் நடைபெற்றது. இந்நிலையில் இந்த படத்தில் பிரகாஷ்ராஜ் இடம்பெறும் காட்சிகளை படமாக்கும் பணிகள் லக்னோவில் உள்ள ஷியா பிரிவு முஸ்லிம்களின் புனிதத் தலமான இமாம்பாடாவில் கடந்த வெள்ளிக்கிழமை தொடங்கியது.
நடிகர் ரஜினிகாந்தும் இந்த படப்பிடிப்பில் கலந்து கொண்டுள்ளார் என நினைத்து அவரை காண மக்கள் அங்கு திரண்டுள்ளனர். கொரோனா பரவல் காலத்தில் மக்கள் அதிகமாக திரண்டதால் ஷியா தலைவர்களில் ஒருவரான மவுலானா சைப் அப்பாஸ், படப்பிடிப்பை தொடர எதிர்ப்பு தெரிவித்துள்ளார். இதையடுத்து ஷியா பிரிவை சேர்ந்த சிலர் கூட்டமாக கூடி நின்று படப்பிடிப்பிற்கு எதிராகக் கோஷம் எழுப்பியுள்ளனர். அதனை தொடர்ந்து படக்குழுவினரும் படப்பிடிப்பை நிறுத்தியுள்ளனர்.
அண்மையில் ‘அண்ணாத்த’ படத்தின் ரிலீஸ் தேதியை படக்குழுவினர் அறிவித்தனர். அதன்படி இந்த ஆண்டு தீபாவளியை முன்னிட்டு 4.11.2021 அன்று அண்ணாத்த படம் திரையரங்குகளில் வெளியாகும் என்றும், விரைவில் படத்தின் பர்ஸ்ட் லுக் வெளியாகும் என்றும் அறிவித்திருந்தனர். இந்நிலையில் கடந்த சில வாரங்களுக்கு முன்பாக அண்ணாத்த படத்தின் டப்பிங் பணிகள் சென்னை மயிலாப்பூரில் உள்ள தனியார் ஸ்டுடியோ ஒன்றில் துவங்கியது குறிப்பிடத்தக்கது.
